هناك أناس يعيشون بفكرة " كل مشكلة و لها حل"، كيف الحل ؟؟ ما عندكش مشكلة "فالحلول على قفا من يشيل"، طالما نحن نعيش في دولة اللاقانون فيمكن حل جميع المشاكل، ولكن كالعادة حل مشكلة بالترقيع من شأنه أن يعود عليك بنتائج لا يمكن أن تتوقعها ، فمثلا جيراننا الفتوّات اللي معبيين الحومة لقوا أن الضي يهرب عليهم ديما زيهم زي باقي الناس و هذا غير منطقي لانهم يبوا المختّش معمر، فالمفروض ميكونوش زي باقي الناس وبناء على هذا سعوا في أنهم ميكونوش زيهم و تمثل ذلك في أنهم يخنبوا الضي من خيط جارهم اللي ربي أكرمه و الضي ما انقطعش عنده بككككككككل، راجل محترم و أولاده لاهيين في روحهم وفي عمره حد ما قال عليهم كلمة ، وجو الفالحين و خنبوا منه الضي و ولى حوشهم الدور الثاني فيه ضي لأنه بانيينه مؤخرا، هو الحق مرقع ترقيع كل سنة يديروا فيه بلكة، على شني يحبوا الأهبل هذاكا مش عارفة .... المهم حوشهم فوق فيه كهرباء و الحوش لوطة مفيش !!!! وممشيين أمورهم، جي جارهم صاحبهم قرر ياخذ منهم حتى هو بالمرة عجباته الحكاية، و في ليلة ما فيهاش ضي قمر سهروا الشلة متع فتوات الحارة في الشارع لصبح ربي و الضي هارب عالشارع و هما يرقعوا في الخيوط، بالأحرى "يخنبوا " وفي رمضااااان، خنبة عيني عينك، وقلبوا الشارع في نص الليل بدوشتهم تقول في مربوعة مقعمزين، و احني و باقي الجيران مضطرين نفتحوا الرواشن باش نتبردوا من هواء ربي، ويا شينك نومة، وهما شادينها رغي و كلام و تفتفيت زايد، ليييييين نجحت عملية الخنبة و بدت الاحتفالات نهارهم الأحرف، عمرك شفت حد يخنب و يفرح بنجاح عمليته و يشهدر بيها قدام خلق ربي عيني عينك، لا ويعلموا في بعضهم كيف ....... بيني وبين نفسي نقول غير اصبروا شوية تتنظم الدنيا و نربيكم يا خنابين.
في اليوم الثاني استمر انقطاع الكهرباء وفاق الأربع و عشرين ساعة، و فجأة يرجع الضي، الحق ما استوعبتش الموضوع، فجأة بدي المكيف يهدر ومعاش عرفت شن هالصوت بالك صوت موطو برا قعدت لحظات لين استوعبت أنه جي، لأنه و الله لما هرب الضي على البلاد هرب عليا الضي معاه، حتى القدرة على التفكير أو التركيز انعدمت مع الصيام، نقول بندير حاجة نتلفت يمين ننساها، ندير حاجة بعد شوية ننسى شن درت، يعني بطاريتي حتى اني تبي تبديل، ناقصنا نحسوا بالحرية، مازال محسيتش بيها في طرابلس، المهم يا صحابي قلنا الضي رجع و فجاة يدب الحماس فينا كل واحد منا يجري يشحن في تلفونه، شحنت تلفوني الخاص بالاتصالات و الثاني الاحتياط متع التراويح ومعاهم اللابتوب، و أختي عجنت خبزة بسرعة و الفلتر بدي يخدم عبينا مية شرب لأننا استهلكنا من المخزون لما هرب الضي و هكذا، حالة استنفار قصوى عمت أرجاء البيت، و فجأة وبعد أقل من ساعة تقريبا هرب الضي مرة أخرى !!!!!!!
لكن المرة هذي مرّارة جيراننا انفجرت، فجأة طلعوا أغلب شباب جيراننا والعة فيهم النارويبوا يعرفوا السبب، كان فيه راجل كلهم ولعوا عليه مفهمتش شن قصته ومن هو أصلا، ونقاش و اتهامات منهم لجيراننا الثانيين اللي خنبوا الضي ولعبوا بالخيوط ، وقالوا أنه كله منهم وفجأة يجي من نهاية الزنقة شيباني ثاني و هو جار لينا وفي ايده "مكنسة" و خاش عليهم بغولته يكشخ من آخر الشارع و يسأل من طفى الضي، هني رد عليه واحد بكل "حنق" وقال: تي أنت الضي لما كان والع عندك مقلت شئ ولا فكرت فينا و مشيت خنبته شن جاي تتكلم توة؟؟ وتبكش الشيباني وتحول إلى حمل وديع معاه جيراننا الثانيين اللي خنبوا قبله، معاش طلع حسهم، وصارت نقاشات طويلة عريضة و هما حالة ، و فجاة يجي ولد جيراننا و ياخد عصا ملوحة في الشارع وشلك وشلك شلك "مؤثرات صوتية - صوت شبشب"جهة حوشنا "ويقتلع" باب صندوق الضي اللي رشقوه الكهرباء على حيط حوشنا من بره و يفتح التاكوات "تك تك تك تك " و يولع الضي في الحومة!!!!!
هذا شن قصده؟ كان يعرف أن الضي يولع من غادي، باهي أمالة شن اللي طفاه، شن صاير بالضبط!!! مفهمت شئ، ويلتموا الشباب قدام الصندوق يتأملوا فيه بالك يفهموا فيه حاجة.
وبعدها بأقل من نص ساعة جي نسيبهم اللي يخدم في الكهرباء "حامييها حراميها" و يرقع الخيوط اللي لعبوا فيها من غير ما ينحيها طبعا و يعطيهم على راسهم، بس زاد عليهم لمساته الفنية بصفته متخصص! وبعدها انتشر الكل ورجعوا لحياشهم، و الضي قاعد صابر و مهربش، و استمر الوضع على هذا الحال حتى صلاة التراويح، الناس مشت تصللي في الجوامع وولاد الحومة جوا للصندوق السحري وبدوا يبربشوا ويرقعوا فيه ثاني، وأني و اختي في الدار نسمعوا في أصوات التبربيش، طلبنا من أختي تطلع تفنص فيهم بالك يتحشموا مع أنه مستحيل لكن قلنا آهو محاولة، طلعت دارت روحها تشوف شن صاير " فرمقوها بنظرة لا مبالية" وكملوا شغلهم!!!
ويادوب رجع أبي من التراويح و كيف قعمز عالتلفزيون هرب الضي !!! لكن ربك كبير، هرب الضي عالنزيه و الخناب، خليهم يقعدوا هكي اللي ما يتحشموش، عندهم خيارين يا الضي يا معمر !! و اعتقد أنه واضح جدا مين الأفيد بين الخيارين!
No comments:
Post a Comment