هذا علاش مش قادرة نفرح .. هذا علاش نتحشم لو نفكر حتى أني نفرح .. صح المفروض نفرحوا بس المفروض أكثر أننا نفرحوا مع بعض .. نحسوا ببعض ..
منبيش ننكد عليكم فرحتكم بالثورة وذكراها .. بس من يومين لما نسوق شفت شيباني يكرّ في برويطة يلم في الخبزة اليابسة .. شفت عيونه، قريت هلبة حاجات ،،، هلبة هلبة أكثر مما تقدروا تتخيلوا ،، كلمات كثيرة كانت تطلع منها مليون معنى ,,, أمس فس السيمافرو، ولد صغير ممكن 12 او14 سنة يبيع في الكلينكس حاط على راسه طاقية الفانيليا متعه و منزلها على قد ما يقدر، يلف بين السيارات زي اللي يهيم على وجهه، نظرات الحزن و التعاسة و الرغبة في البكاء و الصراخ في عيونه .. أني تحشمت منه .. تحشمت تجي عيني في عينه .. بكيت في السيمافرو .. إيه بكيت .. لما نشوف ناس تغش و تخنب و تضحك و تسافر على حساب الجرحى و ناس تلز في ناس من مدنها و عيشتهم في البراريك نتحشم من نفسي .. إيه أنا مش قادرة نفرح .. أنا مش قادرة نفرح و فيه ناس متبهدلة في بلادي و هي من شعبي و قبل كل شئ هما بشر زينا زيهم ..
آسفة يا ذكرى ثورتنا أنا حزينة ومش قادرة منحسش بالناس .. آسفة!
No comments:
Post a Comment